Tge è l'enquista da structura?
L'enquista da structura fa part dal sistem da dumbraziun dal pievel. A chaschun da l'enquista da structura interroghescha l'Uffizi federal da statistica en scrit ina pitschna part da la populaziun. L'enquista cumplettescha las infurmaziuns dals registers e furnescha statisticas supplementaras davart la structura da la populaziun. Emprims resultats stattan a disposiziun in onn suenter il di da referenza. Plinavant vegnan mess a disposiziun resultats cumulads per las periodas da 3 e da 5 onns.
Las caracteristicas las pli impurtantas
- emprova da controlla tar almain 200'000 persunas;
- cumpiglia persunas sur 15 onns che vivan en ina chasada privata;
- po vegnir respundì online u cun in questiunari sin palpiri;
- vegn realisà mintg'onn cun ils 31 da december sco di da referenza. El è accordà cun l'evaluaziun dals registers. Uschia pon las datas da tuttas duas retschertgas vegnir cumbinadas ina cun l'autra;
- furnescha infurmaziuns davart la populaziun, las chasadas, las famiglias, l'abitar, la lavur, la mobilitad pendulara, la furmaziun, la lingua, la religiun e la migraziun;
- metta a disposiziun ils resultats sin ils suandants plauns geografics: Svizra, regiuns grondas, chantuns e vischnancas a partir da 15'000 abitantas ed abitants;
- ils resultats pon vegnir cumulads per 3 e per 5 onns. Quai permetta da far evaluaziuns geograficamain pli pitschnas u tematicamain pli detagliadas;
- ils chantuns e las citads pon engrondir la prova da controlla sin lur territori.
Pertge stoss jau emplenir il questiunari?
La participaziun a l'enquista da structura è prescritta da la Lescha davart la dumbraziun federala dal pievel (SR 431.112). Il Cussegl federal ed il parlament han decis quai l'onn 2007 e fixà in'obligaziun da dar infurmaziuns gratuita e vardaivla per tuttas e tuts abitants da la Svizra, v. artitgel 10 da la Lescha davart la dumbraziun federala dal pievel. L'enquista da structura è la retschertga statistica la pli gronda davart la structura da la populaziun e da las chasadas en Svizra. Ella è da gronda impurtanza per la politica, per l'economia e per l'administraziun.
Pertge èsi impurtant da participar?
Vossa participaziun gida l'Uffizi federal da statistica d'elavurar ina survista cumplessiva da la societad e populaziun svizra e da lur svilup. Las datas relevadas vegnan duvradas da la Confederaziun e dals chantuns per prender decisiuns en la politica economica, d'ambient, dal spazi e da traffic sco er en la politica sociala tar ils temas segirezza sociala, famiglia e furmaziun. L'enquista da structura dat er infurmaziuns impurtantas per la politica da linguas e da religiuns sco er per la politica d'egualitad e da minoritads da la Confederaziun e dals chantuns.
Co èsi cun la protecziun da datas?
Tut las datas registradas èn suttamessas a la Lescha federala davart la statistica federala (SR 431.01) ed a la Lescha federala davart la protecziun da datas (SR 235.1). Quai vul dir che tut las infurmaziuns vegnan tractadas en moda absolutamain confidenzialas, ellas vegnan duvradas be per analisas statisticas fixadas en la lescha e na dastgan mai vegnir transmessas ad autras instituziuns per intents administrativs. Voss num e prenum, Vossa adressa e numer da telefon vegnan stizzads definitivamain suenter l'elavuraziun ed il numer da l'AVS vegn codà, per ch'ella na saja betg pli identifitgabel. Dals resultats publitgads na sa laschan trair naginas conclusiuns areguard las relaziuns persunalas da singulas chasadas e da singulas persunas. Las collavuraturas ed ils collavuraturs dal Uffizi federal da statistica e dals instituts da retschertga involvids èn suttamess a l'obligaziun da mantegnair il secret.
Datti multas, sch'ins refusa da dar infurmaziuns tar l'enquista da structura?
L'enquista da structura è bain obligatorica, la Lescha davart la dumbraziun dal pievel na prevesa dentant naginas multas per persunas che refusan da dar infurmaziuns, mabain ina taxa d'elavuraziun. Tgi che na respunda betg, chaschuna lavur supplementara u custs supplementars, per exempel per scriver ina brev da memoria u per far scleriments. Las experientschas ch'èn vegnidas fatgas fin ussa cun las enquistas da structura mussan, che la prontezza da sa participar a l'enquista da structura è fitg gronda e ch'i na ston perquai betg vegnir incassadas taxas.
Co sun jau vegnì tschernì per l'enquista da structura?
Las emprovas da controlla vegnan tratgas tenor il princip da la casualitad or dal register d'emprovas da controlla da l'Uffizi federal da statistica. Quai sin basa da las datas dals registers da persunas uffizials da las vischnancas, dals chantuns e da la Confederaziun.
Pertge sun jau vegnì tschernì/essan nus vegnids tschernids danovamain per l'enquista da structura?
Per regla na duess quai betg capitar, damai che l'Uffizi federal da statistica (UST) ha introducì ina procedura per reparter la chargia d'enquistas egualmain sin tut la populaziun. Tuttina n'impedescha questa procedura betg tut las tschernas multiplas. Ch'ina persuna vegn tschernida danovamain po vegnir declerà tranter auter cun ina midada da chasa, cun ina dimora a l'exteriur u cun la grondezza da la chasada. Tals cas èn rars, ed il UST fa il pussaivel per evitar els. Nus As supplitgain d'avair chapientscha. Empleni per plaschair tuttina il questiunari.
Pertge ha mia chasada survegnì dus questiunaris per l'enquista da structura?
Quai na duess betg capitar. Eventualmain cuntegnan ils registers, che servan sco basa per l'Uffizi federal da statistica per tscherner l'emprova da controlla, infurmaziuns manglusas davart la cumposiziun da Vossa chasada. Vus stuais emplenir mo in dals questiunaris. Decisiv è il questiunari da quella persuna che ha sco emprima anniversari durant l'onn. Grazia fitg per Vossa chapientscha.
Pertge ha jau survegnì ina brev senza questiunari sin palpiri?
Perquai che adina dapli persunas dovran l'internet, vuless l'Uffizi federal da statistica (UST) intimar las persunas interrogadas d'emplenir il questiunari online. Igl è pli simpel e pli svelt d'emplenir il questiunari online, ed i custa er main per la Confederaziun. Pervia da quai trametta il UST ad ina gronda part da la populaziun interrogada ina brev che cuntegna mo las infurmaziuns d'access per il questiunari online. Sche Vus n'avais nagina pussaivladad d'emplenir il questiunari online, pudais Vus empustar tar la hotline in questiunari sin palpiri.
Pertge duai mes uffant sa participar a l'enquista da structura? El n'è anc betg maioren.
En questa retschertga vegnan registradas infurmaziuns davart la structura e davart il svilup da la populaziun en Svizra. Pervia da quai duess ella cumpigliar sche pussaivel l'entir spectrum da la populaziun, er ils giuvenils e las persunas giuvnas creschidas.
En Svizra terminescha il temp da scola en la vegliadetgna da 15 fin 16 onns. Ils giuvenils cumenzan quel mument ubain in emprendissadi ed entran en il martgà da lavur, ubain frequentan ina scola da cuntinuaziun. Las respostas dals giuvenils a partir da 15 onns èn impurtantas per la forza expressiva da las statisticas da la populaziun, er per las pudair cumparegliar cun statisticas internaziunalas.
Dastga l'Uffizi federal da statistica dar vinavant datas registradas ad autras autoritads sco per exempel l'administraziun da taglia u la AI?
Na, quai è reglà cleramain en la lescha. Las datas retschertgadas per la dumbraziun dal pievel vegnan anonimisadas e dastgan vegnir duvradas mo per intents statistics.
Tge pussaivladads hai jau per emplenir il questiunari da l'enquista da structura?
Nus As recumandain d'emplenir il questiunari online. Il questiunari online stat a disposiziun en las linguas rumantsch, tudestg, franzos, talian ed englais. Vus pudais emplenir il questiunari online sin Voss smartphone, Voss desktop/laptop u Voss tablet. Il pled-clav ed il num d'utilisaziun (=login) chattais Vus en la brev u, sche Vus avais survegnì in questiunari sin palpiri, sin il formular cun l'indicaziun "Questiunari davart la persuna".
www.ecensus.bfs.admin.ch - questiunari online
Il questiunari sin palpiri stat a disposiziun en las linguas rumantsch, tudestg, franzos e talian. Sche Vus vulais respunder il questiunari sin palpiri ed avais survegnì mo ina brev cun las datas d'access per il questiunari online, As pudain nus trametter in questiunari sin palpiri. Contactai per plaschair la hotline en quest cas.
En tge linguas stat il questiunari a disposiziun?
Il questiunari online stat a disposiziun en las linguas rumantsch, tudestg, franzos, talian ed englais. Nus As recumandain d'emplenir il questiunari online.
www.ecensus.bfs.admin.ch - questiunari online
Il questiunari sin palpiri stat a disposiziun en las linguas rumantsch, tudestg, franzos e talian.
È il questiunari er disponibel en spagnol, en portugais, en tirc, en albanais, en serb, en croat, en bosniac u en montenegrin?
Il questiunari na stat deplorablamain betg a disposiziun en questas linguas. Disponibel è però in agid da translaziun en furma d'ina broschura. Sche Vus giavischais, As pudain nus er trametter questa broschura per posta. Contactai per plaschair la hotline en quest cas.
Agid da traducziun per l'enquista da structura 2025
Tgi è responsabel per la gestiun dal questiunari online da l’enquista da structura eCensus?
Dal punct da vista tecnic procura l’interpresa Demo SCOPE AG, ch’il questiunari online vegnia mess a disposiziun e tgirà. Quai fa ella per incumbensa da l’Uffizi federal da statistica (UST) e tenor las prescripziuns specificas e quellas davart la protecziun da datas dal UST. Tenor la Lescha davart la dumbraziun dal pievel dastga il UST surdar incumbensas da far enquistas a terzs. Applitgond il dretg d’acquisiziun svizzer è questa incumbensa vegnida surdada a Demo SCOPE AG.
È il questiunari online eCensus accessibel senza barrieras?
Gea, la pagina d'internet www.ecensus.swiss è vegnida sviluppada en ina versiun ch'è accessibla per persunas cun impediments da la vesida ed è vegnida certifitgada il december 2025 da la fundaziun «Access per tuts». Il eCensus ademplescha il standard ed il stgalim da confurmitad WCAG 2.2 AA.
Co funcziuna il scanning dals questiunaris sin palpiri?
Il mandat per scannar ils questiunaris è vegnì surdà tras ina submissiun OMC a la firma Tessi Switzerland GmbH. L'agiudicaziun è vegnida publitgada ils 7 da matg 2018 sin www.simap.ch. Ils questiunaris sin palpiri arrivan cun ina cuverta da resposta prefrancada tar il Center da servetschs per la registraziun da datas da l'Uffizi federal da statistica che vegn garantì tras Tessi. Ils questiunaris vegnan scannads e las respostas inditgadas vegnan transfurmadas a maun d'ina identificaziun optica da segns (OCR) en datas electronicas. Sche las proceduras automaticas dad OCR n'han betg success, vegn il questiunari elavurà a maun. Las datas scannadas na bandunan betg la Svizra, ellas pon dentant vegnir elavuradas en Tunesia da collavuraturas e collavuraturs scolads specificamain da Tessi sur in sistem online segirà. La correctura manuala da singulas datas è segirada tras vastas mesiras da protecziun da datas ch’èn almain equivalentas a quellas che vegnan applitgadas en Svizra.
Èn ils resultats er accessibels a la publicitad?
Ils resultats èn accessibels a tut las persunas interessadas. Sin ils portals d'internet da l'Uffizi federal da statistica (UST) e dals chantuns stattan a disposiziun numerus resultats resumads (tabellas, chartas e.u.v.). Datas individualas anonimisadas vegnan messas a disposiziun en il rom da projects da perscrutaziun e suenter avair fatg in contract davart la protecziun da datas.
Il UST publitgescha las infurmaziuns, l'evaluaziun da las datas è però chaussa dals utilisaders, p.ex. dals chantuns, dals uffizis federals, da las interpresas u dals scienziads. La populaziun profitescha indirectamain da questas evaluaziuns che servan sco basa da planisaziun e da decisiun.
